English 
Prishtinë, 22 shkurt, 2018 – Mungesa e shkathtësive profesionale mbetet një nga shqetësimet kryesore në punësimin e të rinjve pavarësisht edukimit të lartë që arrijnë të përfundojnë, derisa përpjekje më të mëdha duhen bërë edhe në aspekt të luftimit të informalitetit në punësim. Kjo u tha sot në tryezën e organizuar nga Oda Ekonomike Amerikane në Kosovë e titulluar “Ndërtimi i një tregu të punës për të ardhmen”, pjesë e aktiviteteve të organizuara për nder të dhjetëvjetorit të pavarësisë së Kosovës.
Basri Ibrahimi, Kryeinspektor i Punës, tha se përkundër rritjes së dukshme të të punësuarve gjatë vitit 2017, vetëdijësimi dhe informimi i punëtorëve dhe punëdhënësve mbi sigurinë në punë mbetet ende i vogël. Ai përmendi ankesat e shumta të kompanive në mungesën e kuadrove gjatë kërkimit të punëtorëve të rinj, ky si rezultat i mungesës së aftësive të duhura në vendin e kërkuar. Ai u bëri thirrje institucioneve relevante të zhvillojnë një analizë të mirëfilltë të tregut të punës në mënyrë që t’i orientojnë të rinjtë në drejtimin e duhur në gjetjen e vendit të punës.
Mërgim Prishtina, kryesues i Komitetit të Prodhuesve në Odën Amerikane dhe Kryeshefekzekutiv i Trepharm, tha se avancimi i legjislacioneve në tregun e punës duhet të jetë në përputhshmëri me zhvillimin ekonomik. Ai shtroi shqetësimin e mungesës së aftësive profesionale të studentëve të diplomuar të cilët duhet t’iu nënshtrohen trajnimeve përkatëse në aftësimin e tyre. Ai shtoi se bashkëpunimi institucional do të reflektojë në zvogëlimin e nivelit të lartë si të papunësisë ashtu edhe informalitetit në punë. Ai kërkoi një qasje më fleksibile ligjore në rregullimin e marrëdhënieve ndërmjet punëdhënësve dhe marrësve.
Visar Dobroshi, Partner Menaxhues në Recura Financials, përmendi faktin e rritjes së vetëdijësimit të kompanive në investimet në edukim, sigurinë në punë, si dhe respektimin e ligjeve në punë. Ndërsa Arben Ymeraga, Partner në Melita & Partners, foli edhe për certifikimin e studentëve nga ana e kompanisë së tij e cila ka ndikuar që aftësitë teorike që ata i posedojnë t’i shfaqin edhe në praktikë.
Pjesëmarresit më tutje shprehën shqetësimet e tyre në zhvillimin e iniciativave të reja në tregun e punës e cila do të reflektojë në zhvillimin e mëtutjeshëm ekonomik.