English 
Prishtinë, 22 nëntor, 2018 – Pavarësisht faktit që zbatimi i Marrëveshjes së Stabilizim Asociimit (MSA) lehtëson procesin e eksportit të produkteve të bizneseve kosovare në vendet e Bashkimit Evropian dhe ndihmon qasjen e produkteve në tregjet evropiane pa detyrime doganore, Kosova ende has në vështirësi dhe barriera në zbatimin e plotë të saj. Kështu u tha sot në punëtorinë e organizuar nga Oda Ekonomike Amerikane në Kosovë në kuadër të projektit “Zhvillimi i sektorit privat përmes zbatimit të MSA”, që financohet nga Agjensioni Suedez për Zhvillim dhe Bashkëpunim Ndërkombëtar (Sida), menaxhuar nga Fondacioni Kosovar për Shoqëri Civile (KCSF).
Visar Hapçiu, Udhëheqës i Institutit për Hulumtime Ekonomike në Odën Amerikane, njoftoi të pranishmit mbi strukturat dhe mekanizmat e Bashkimit Evropian mbi lëvizjen e lirë të mallrave brenda vendeve anëtare ku eksportuesit kanë trajtim të barabartë dhe produktet e tyre plasohen në shtete të ndryshme pa iu nënshtruar detyrimeve doganore. Hapçiu tha se harmonizimi i legjislacionit nacional rezulton në qarkullim të lirë të mallrave duke evituar dispozitat kombëtare me efekt të barrierave dhe vendos kushtet për qarkullim të mallrave në përputhje me normat dhe rregulloret që kanë në fokus mbrojtjen e konsumatorit, mjedisit, dhe konkurrencës. Ai shtoi se shtyllat e lëvizjes së lirë të mallrave brenda BE-së të cilat përfshijnë unionin doganor, promovimin e standardizimit, njohja reciproke, parimi i jo-diskriminimit, etj, shërbejnë si mekanizma esencial për të zhvilluar tregtinë dhe eskportin mes këtyre vendeve.
Albion Ujkashi, Zyrtar i Politikave në Odën Amerikane, tha se përvec mundësimit të eksporteve të produkteve kosovare në tregjet e vendeve anëtare të BE-së pa detyrime doganore, zbatimi i Marrëveshjes së Stabilizim Asociimit ndikon edhe në nxitjen e ekonomisë së lirë dhe integrimit ekonomik, invesime në infrastrukturë të cilësisë e investime të huaja direkte, njohje të ndërsjelltë të produkteve, e shumë të tjera. Ai tha se përkundër faktit që shumica e bizneseve konsiderojnë se mjedisi fiskal është përmirësuar jashtëzakonisht nga viti 2014, shqetësues mbetet fakti që vetëm rreth 6% të bizneseve besojnë se institucionet kanë punuar në mënyrë efikase në zbatimin e masave të dala nga MSA çka edhe kërkon që të ketë vëmendje më të shtuar në këtë drejtim në mënyrë që bizneset në sektorin privat të mos hasin barriera në eksportimin e produkteve të tyre.
Më tutje, të pranishmit patën rastin të paraqesin sfidat me të cilat ata përballen në procesin e eksportit në vendet e BE-së si dhe në rajon, duke kërkuar që institucionet të jenë më active në zbatimin dhe implementimin e masave të dala nga MSA.