English 
Prishtinë, 24 tetor 2016 – Oda Ekonomike Amerikane në Kosovë priti sot në një takim joformal Guvernatorin e Bankës Qendrore të Republikës së Kosovës, Bedri Hamza. Në këtë takim anëtarët e pranishëm patën mundësi të informohen rreth gjendjes aktuale të sektorit financiar dhe të diskutojnë mbi çështje të cilat konsiderohen të nevojshme për t’u përmirësuar, me qëllim të krijimit të një ambienti më të qëndrueshëm të të bërit biznes.
Drejtori Ekzekutiv i Odës Amerikane Arian Zeka vlerësoi lartë bashkëpunimin me Bankën Qendrore, duke konsideruar se Banka Qëndrore e Republikës së Kosovës ka luajtur një rol të rëndësishëm në krijimin e një sektori të qëndrueshëm bankar.
Bersant Disha nga Recura Financials, njëkohësisht edhe nikoqir i kësaj ngjarje tha se përmes bashkëpunimit të Bankës Qendrore me sektorin privat, është mundësuar tërheqja e investimeve të shumëta dhe janë krijuar më shumë mundësi për bashkëfinancime, qofshin ato ndërmjet bankave komerciale apo ndërmjet bankave komerciale me partner të tjerë të sektorit privat. Sidoqoftë, sipas Dishës, një bashkëpunim i tillë kërkon krijimin e mëtutjeshëm të mekanizmave për përmirësimin e sektorit të shërbimeve financiare në Kosovë.
Guvernatori i Bankës Qendrore të Republikës së Kosovës, Bedri Hamza tha se pjesëmarrja në ngjarje të tillë është e një rëndësie të veçantë për faktin se sektori privat përveq që kontribuon në buxhetin e shtetit, kontribuon edhe në krijimin e vendeve të reja të punës dhe si rezultat në rritjen e zhvillimit ekonomik. Hamza vleresoi se sektori privat karakterizohet me zhvillime pozitive, të cilat dëshmohen jo vetëm në raportet dhe vlerësimet pozitive të Bankës Botërore dhe të Fondit Monetar Ndërkombëtar (FMN). Vlerësime të tilla dëshmohen edhe si rezultat i suksesit të konsiderueshëm të sektorit bankar në Kosovë në dy vitet e fundit, në raport me rritjen e vëllimit të kredive, rënien e normës së interesit dhe rënien e kredive joperformuese. Hamza poashtu shtoi se sektori mikrofinanciar është konsoliduar dukshëm në Kosovë, por që sektori i sigurimeve ka ende hapësirë për t’u zhvilluar më tutje, ku sipas tij ky zhvillim do të mundësohej përmes ngritjes së dialogut dhe thellimit të bashkëpunimit.
Ardi Shita Sekretar i Përgjithshëm i Bordit të Guvernatorëve të Odës Amerikane vlerësoi bashkëpunimin me Bankën Qendrore, duke theksuar se sektori i sigurimeve si dhe sektorët e tjerë kanë ende nevojë t’u nënshtrohen disa përmirësimeve, në kuptim të dizajnimit të strukturave ligjore që sigurojnë mirëfunksionimin e këtyre sektorëve.
Çështje të cilat u ngritën nga sektori privat ishin në lidhje me koordinimin më të mirë ndërmjet sektorit financiar dhe institutioneve shtetërore, numrin e madh të lëndëve të pazgjidhura si dhe trajtimin e kredive hipotekare.