English 
Prishtinë, 25 gusht 2016 – Oda Ekonomike Amerikane në Kosovë në bashkëpunim me Odën Ekonomike të Kosovës, Administratën Tatimore të Kosovës (ATK) dhe Doganën e Kosovës, si dhe në prezencën e Kryeministrit të Kosovës dhe Ministrit të Financave organizoi ceremoninë e shpërblimit të tatimpaguesve më te mëdhenj dhe më të rregullt. Ky aktivitet synon njohën publike të kompanive që konsiderohen të jenë kontribuuesit më të mëdhenj të buxhetit të vendit, por edhe ngritjen e vazhdueshme të vetëdijes së komunitetit të biznesit për detyrimet e tyre ndaj shtetit. Bizneset janë përzgjedhur sipas qarkullimit vjetor, 100.000-1 mil. euro; 1 milion-5 milionë euro dhe mbi 5 milionë euro, duke përshirë edhe bizneset e reja, biznese këto të cilat nuk kanë kundërvajtje doganore apo tatimore.
Drejtori Ekzekutiv i Odës Amerikane në Kosovë Arian Zeka theksoi se kjo ceremoni ka për qëllim mirënjohjen jo vetëm për tatimpagues të mëdhenj, por edhe për tatimpagues të rregullt e që i shërbejnë buxhetit të vendit. Përfaqësuesi i Odës Ekonomike të Kosovës Hivzi Dragidella tha se kryerja e obligimeve ndaj shtetit është kusht për një ekonomi të fuqishme të vendit. Kryeministri i Republikës së Kosovës, z. Isa Mustafa theksoi se reformat fiskale janë implementuar me qëllim të krijimit të kushteve më të mira të të bërit biznes, duke u mundësuar kështu bizneseve të jenë konkurrente edhe në tregun e BE-së, i cili është njëkohësisht edhe qëllimi themelor. Ministri i Financave, Avdullah Hoti tha se ministria do të vazhdojë të implementoj reforma fiskale, duke përfshirë edhe kërkesën e vazhdueshme të Odës Amerikane për pushimet tatimore.
Drejtori i ATK-së, Sakip Imeri theksoi se administrata parasheh aktivitete të reja në mënyrë të lehtësimit të zbatimit të ligjit dhe luftimit të ekonomisë joformale, duke përfshirë edhe ofrimin e shërbimeve të veçanta për tatimpaguesit e mëdhenj.
Drejtori i Doganës, Lulzim Rafuna vlerësoi se komunikimi dhe transparenca e bizneseve ndaj doganës dhe anasjelltas, kanë ndikuar në zvogëlimin e ankesave karshi doganës si dhe në rritjen e të hyrave.
Tatimpaguesit e vitit 2015 në bazë të kategorisë së bizneseve me qarkullim mbi 5 milion euro janë: Cacttus Sh.A, Coca-Cola Hellenic Bottling Company-Kosovo, Kid Zone Kosova Sh.P.K, Ndërmarrja Tregtare Fortesa, Scan Color-Jysk Sh.P.K. Bizneset e shpërblyera sipas qarkullimit 1-5 milion euro janë: Alma Sh.P.K, Deloitte Kosova, Laguna Sh.P.K., N.T.P Arena Engineering, Studio Moderna Kosovë Sh.P.K. Kategoria e bizneseve me qarkullim 100,000- 1 milion euro jan: Fox Marble Kosova Sh.P.K., Grant Thornton L.L.C., Mirevski-Kosovo D.O.O., N.N.P. Tekno-Konstrukt, Tiki Sh.P.K, ndërsa kategoria e bizneseve të reja janë: Addo Group L.L.C., Defacto Retail KS L.L.C. dhe Drena Sh.P.K.