English 
Prishtinë, 6 shtator, 2018 – Marrëveshja e Stabilizim Asociimit është marrëveshja e parë kontraktuale mes Bashkimit Evropian dhe Kosovës ndikimet e së cilës vërehen drejtpërdrejt në aktivitetin biznesor të ndërmarrjeve në sektorin privat në vend. Pavarësisht rëndësisë së madhe të saj në zhvillimin ekonomike të vendit, bizneset vazhdojnë të kenë njohuri mjaft të pakta mbi përfitimet dhe procedurat e kësaj marrëveshje. Ky ishte konkluzioni kryesor nga prezantimi i studimit të realizuar nga Oda Ekonomike Amerikane në Kosovë mbi MSA-në, projekt i financuar nga Agjensioni Suedez për Zhvillim dhe Bashkëpunim Ndërkombëtar (Sida) menaxhuar nga Fondacioni Kosovar për Shoqëri Civile (KCSF).
Arian Zeka, Drejtor Ekzekutiv i Odës Amerikane, tha se Marrëveshja e Stabilizim Asociimit nuk është e rëndësishme vetëm se përbën aktin e parë kontraktual mes Kosovës dhe Bashkimit Evropian por edhe pse ka ofruar një mundësi të re në aspektin e eksporteve për prodhuesit nga Kosova. Ai tha se Oda Ekonomike Amerikane ka qenë e angazhuar rreth MSA-së që në periudhën e negocimit të saj, duke ofruar propozimet e saj për Ministrinë e Tregtisë dhe Industrisë së Kosovës. Ai shtoi se derisa marrëveshja po shfrytëzohet nga ana e kompanive tregtare, gjë që po reflektohet edhe në statistikat e tregtisë së jashtme, respektivisht të atyre të importit nga vendet e BE-së.
Ndërsa Fatmir Curri, Drejtor i Programit për Grantdhënie në Fondacionin Kosovar për Shoqëri Civile (KCSF), tha se synimi i realizimit të këtij projekti ka qenë identifikimi i sfidave dhe problemeve të bizneseve në zbatimin e kësaj marrëveshjeje. Ai falënderoi Odë Amerikane për ndihmën dhe seriozitetin e treguar në zhvillimin e këtij studimi.
Visar Hapçiu, Udhëheqës i Institutit për Hulumtime Ekonomike në Odën Amerikane, shpalosi të gjeturat nga anketa e realizuar me 500 biznese në 7 rajone të ndryshme të Kosovës e cila ka analizuar nivelin e njohurive të bizneseve në vend mbi MSA-në si dhe ndikimet që kjo marrëveshje ka pasur deri tani në afarizmin e tyre. Ai njoftoi të pranishmit se bizneset e anketuara janë shprehur të kënaqura në vlerësimin e reformave në mjedisin fiskal, e poashtu edhe procedurave doganore. Ai përmendi si shqetësuese nivelin e vogël bizneseve të cilat janë shprehur se kanë njohuri mjaft pak mbi MSA-në, duke konkluduar se duhet të punohet më shumë në rritjen e dialogut mes sektorit publik dhe atij privat për të pasur rritje të kapacitetit konkurrues të ndërmarrjeve.
Bedri Hamza, Ministër i Financave, përgëzoi Odën Amerikane mbi studimin e zhvilluar duke thënë se publikime të tilla na ndihmojnë të adresojmë qështje të cilat mund të ndikojnë pozitivisht në operimet e bizneseve. Ai shtoi se rekomandimet e dhëna nga asociacionet e bizneseve kanë ndikuar në implementim e duhur të reformave të reja në politikat fiskale të cilat kanë lehtësuar procesin e të bërit biznes në Kosovë. Ai poashtu përmendi zhvillimin e ligjeve të reja, si ligjin e tatimit në të ardhurat e korporatave si dhe në të ardhurat personale, duke shtuar se Ministria që ai drejton do të punojë vazhdimisht në lehtësira të tjera për komunitetin biznesor.
Kujtim Gjevori, Kryesues i Komitetit të Prodhimit në Odën Amerikane, tha se duhet të rritet dialogu mes sektorit privat dhe atij publik në mënyrë që të mbrohen produktet vendore në tregjet ndërkombëtare. Ai parashtroi prioritetet e identifikuara të komitetit prodhues të Odës Amerikane, duke shtuar se duhet të adresohen edhe më tej vështirësitë e prodhuesve vendorë që të krijohen vende të reja të punës e njëkohësisht edhe rritje të eksporteve.