English 
Prishtinë, 28 Shtator, 2019 – Oda Amerikane edhe këtë vit organizoi turneun tradicional bamirës të futbollit, John McCain, i cili përveç qëllimeve filantropike, gjithashtu synon të nderojë miqësinë mes Shteteve të Bashkuara të Amerikës (SHBA) dhe Kosovës.
Gjithsej 18 ekipe morën pjesë në këtë ngjarje vjetore sportive, duke kontribuar financiarisht për të i ndihmuar personat apo organizatat në nevojë përmes fondacionit të Odës Amerikane. Ekipet pjesëmarrëse ishin përfaqësuese të kompanive Coca Cola HBC Kosovo (3 ekipe), Limak International Kosova, NLB Banka, Atlantik Group, Emona Group, Cacttus, Kolegji AAB, VI Print, KFC, Burger King, Sigal Uniqa Group Austria, KEP Trust, Banka Kombëtare Tregtare, Finca, dhe Al-Trade Center. Për më tepër, ky aktivitet u mbështet edhe nga Red Bull. Përveç se kaluan një ditë argëtuese futbolli, ekipet garuan mes vete brenda katër grupeve, dhe rrjedhimisht, ata që fituan në fazën e grupeve, vazhduan në gjysmëfinale. Fitues të turneut ishin Emona Group për vendin e parë, dhe Coca Cola HBC Kosovo për të dytin.
Fondet e mbledhura nga turneu do të iu dedikohen mbështetjes së personave të cilët kanë nevojë për ndihmë financiare për intervenime mjekësore në raste urgjente. Oda Amerikane i falënderon kompanitë pjesëmarrëse për kontributin e tyre, si dhe mbetet e vendosur të ofroj mbështetje për iniciativa apo aktivitete të lidhura me bamirësinë, në mënyrë që ta përmirësojë dhe lehtësojë jetën e shoqërisë kosovare.