English 
Prishtinë, 20 gusht 2019 – Përkrahja e bizneseve prodhuese përmes lehtësirave duhet të jetë prioritet i Qeverisë së re për të rritur kapacitetet prodhuese në vend si dhe rritjen e eksportit të produkteve kosovare. Kjo u tha në tryezën e organizuar nga Oda Ekonomike Amerikane në Kosovë ku prodhuesit ofruan rekomandimet e tyre për Qeverinë e re.
Drejtori Ekzekutiv i Odës Amerikane, Arian Zeka, tha se synimi i kësaj tryeze është të ofrohen rekomandimet e sektorit të prodhimit për qeverinë e re në aspekt të zhvillimit të mëtutjeshëm të sektorit në vend.
Zeka tutje shtoi se disa nga sfidat me të cilat ballafaqohen prodhuesit kosovarë përfshijnë mungesën kuadrove të kualifikuara, duke përmendur mes tjerash edhe ligjin për tregtinë e brendshme i cili pritet të jetë edhe një ndër prioritetet e Qeverisë e re.
Kryesuesi i Komitetit të Prodhimit të Odës Amerikane njëherit përfaqësues nga kompania SCAMPA, Kujtim Gjevori, tha se krahas zhvillimit të arritur në industrinë e prodhimit, lehtësirat duhet të vazhdojnë nga Qeveria e re. Ai tha se ky sektor ballafaqohet me problematika të ndryshme të cilat duhet të adresohen për ta nxitur tutje zhvillimin e prodhuesve përmes qasjes në financa, e poashtu edhe duke adresuar problemet në energji elektrike, si dhe mungesën e kuadrove të kualifikuara në fuqinë punëtore, duke shtuar se nevojitet një kordinim më i madh mes sektorit privat dhe atij publik në aftësimin e fuqisë punëtore e cila i nevojitet tregut.
Bajram Rushiti nga kompania Buka Bakery tha se për të zhvilluar më tutje bizneset prodhuese në vend ato duhet të identifikohen me një numër të veçantë rreth asaj se çfarë prodhojnë kompanitë. Rushiti tha se qasja në financa për prodhuesit duhet të përmirësohet duke pasur parasysh humbjet e mëdha të cilat këto kompani regjistrojnë në operimet e tyre.
Gojart Kelmendi nga kompania EuroKosova tha se duke pasur parasysh se Kosova ka një deficit të madh tregtar me vendet në rajon, krijimi i një strategjie afatshkurtër dhe afatgjate do të ishte i nevojshëm i cili do zhvillonte këtë sektor. Në adresimin e mungesës së fuqisë punëtore të kualifikuar, ai tha se reduktimi i migrimit të të rinjve në vendet e huaja do të mund të bëhej përmes rritjes së sektorit të prodhimit.
Ndërsa Ylber Bajraktari nga kompania StoneCastle tha se mungesa e përkrahjes nga Qeveria në operimet e tyre ka ndikuar që bizneset të mos jenë mjaft konkurruese me vendet në rajon, duke shtuar se detyrimet doganore po rezultojnë në kosto të larta për prodhimin e produkteve të tyre.