Sektori i hoteleve në Kosovë ballafaqohet me vështirësi në punësim të stafit

Prishtinë, 10 maj, 2018 – Në kuadër të vizitës së delegacionit nga Iowa në Kosovë, Oda Ekonomike Amerikane në Kosovë sot zhvilloi një diskutim të hapur mes kompanive anëtare me Dwight Lykins nga Provisions Lot F në parkun hulumtues të shtetit të Iowa-s. Diskutimi u zhvillua mes përfaqësuesve të kolegjeve dhe hoteleve kosovare të cilat paraqitën sfidat dhe vështirësitë në tregun kosovar.

Dwight Lykins tha se zhvillimi i hoteleve dhe restauranteve në SHBA është i ndërlidhur ngushtë me universitetet dhe shkollat profesionale nga të cilat individët aftësitë që i marrin janë të domosdoshme në punësimin e tyre. Ai shtoi se aftësimi i të punësuarve është kyç në zhvillimin e kompanisë dhe arritjen e suksesit.

Pjesëmarrësit nga Emerald Hotel, Villa Gërmia, RIT Kosovo, Kolegji Universi, Kolegji Heimerer, si dhe Shoqata e Hotelierëve të Kosovës përmendën vështirësitë që hasin në punësimin e stafit adekuat për periudha më të gjata, duke përfshirë mungesën e shkollave të veçanta në aftësimin e personave në drejtime të hotelerisë. Mes të tjerash, u diskutua inspektorimi në hotele, aspektet ligjore në Kosovë, si dhe raporti mes edukimit dhe punësimit në kompanitë kosovare.