Studentët e AAB diskutojnë mbi rolin e edukimit në Ndërmarrësi

Prishtinë, 22 Nëntor, 2019 – Oda Ekonomike Amerikane në Kosovë në bashkëpunim me Kolegjin AAB, në kuadër të Javës Globale të Ndërmarrësisë 2019, organizoi një bashkëbisedim me studentët e këtij kolegji rreth nxitjes së ndërmarrësisë përmes edukimit.

Ndërmarrësja e e suksesshme Shemsije Dërmaku nga GrandDekor, ndau me studentët rrugëtimin e saj që nga viti 1999 e deri më sot duke diskutuar mbi sfidat e saj në zgjerimin e biznesit. Ajo tha se për të qenë  një ndërmarrëse e sukssesshme duhet të investosh më shumë në vetvete se sa në kapitalin e biznesit. Ajo këshilloi të rinjët që të rrethohen me njerëz pozitiv dhe të suksesshëm në mënyrë që idetë e tyre të mos bien në vesh të shurdhër, por në fakt të gjejnë mbështetje.

Pranvera Dalloshi nga Bliss Cosmetics, tha se është e rëndësishme për ndërmarrësit por edhe për të rinjët që të dijnë se sot jetojmë në epokën e të mësuarit të vazhdueshëm, dhe se me zhvillimet e ndryshme teknologjike asnjëherë nuk ka qenë më e lehtë qasja në informacione dhe mësimi i gjërave të reja.  Ajo shtoi se duhet të avancohemi vazhdimisht në mënyrë që të jemi adaptiv ndaj ndryshimeve të fundit që po ndodhin në treg.  Dalloshi sygjeroi që në Kosovë sistemi arsimor të orientohet nga ndërmarrësia në mënyrë që të mbjellet një kulturë ndërmarrëse, me qenë se kjo është një nga akterët kryesorë të zhvillimit ekonomik të vendit.

Në anën tjetër, Pleurat Mustafa, ligjërues në fushën e ndërmarrësisë, tha se padyshim që sistemi i arsimimit luan rol në zhvillimin dhe fuqizimin e ndërmarrësisë në vendin tonë, por që duhet të punohet ende në këtë drejtim sepse sistemi i edukimit tek ne është në mospërputhshmëri me nevojat e tregut. Ai shtoi se modifikimi i praktikave edukative është i nevojshëm për të ngjallur shpirtin ndërmarrës tek të rinjët, në mënyrë që të zbutet hendeku midis shkathtësive që ofron sistemi i edukimit dhe i atyre që kërkohet në tregun e punës. Sipas tij përshpejtimi i aplikimit të këtyre ideve në praktikë ndikon në zgjidhjen e problemeve të qytetarëve dhe automatikisht rritjen e mirëqenies së tyre.