English 
Prishtinë, 19 nëntor 2019 – Në kuadër të Javës Globale të Ndërmarrësisë, Oda Amerikane në bashkëpunim me Fondin Kosovaro-Amerikan për Edukim (KAEF), organizoi tryezën e diskutimit “Inovacioni dhe Kontraktimi i Proceseve Afariste: Sfidat dhe Mundësitë në Kosovë” me panelistët Armend Ukshini, Jeta Zagragja, Ermal Sadiku, Diedon Kica dhe Egzon Halili. Në këtë tryezë u tha se ecuria e suksesshme e sektorit të shërbimeve dixhitale në Kosovë ka identifikuar ekzistimin e një ekosistemi i cili duhet të vazhdohet nga shumë kënde.
Ermal Sadiku, Anëtar i Bordit në KAEF dhe themelues i LinkPlus, duke përmbledhur rrugëtimin e tij si ndërmarrës në fushën e teknologjisë informative, cilësoi kualifikimin e fuqisë punëtore si një nga sfidat kryesore në këtë sektor. Sadiku shtoi se në këtë drejtim, duhet të ketë ndryshim të sistemit arsimor sipas dinamikave aktuale të teknologjisë.
Egzon Halili, bursist i KAEF dhe Shef Ekzekutiv në Monego, shprehi se profilizimi i fuqisë punëtore dhe përpilimi i strategjive afatgjate të veprimtarive të qëndrueshme janë dy faktorë të cilët duhet të jenë në fokus.
Jeta Zagragja, Anëtare e Bordit të KAEF dhe përfaqësuese e UCX, posaçërisht theksoi nevojën për hulumtim dhe mësim të vazhdueshëm si kusht kyç për zhvillimin e suksesshëm në këto sektorë, ku konsideron se duhet të bëhet praktikë edhe brenda kompanive.
Armend Ukshini, Drejtor i Operimeve në Kosbit, foli për rëndësinë e krijimit të investimeve dhe qasjen në dije globale për zhvillimin e mëtejshëm të potencialit të Kosovës. Në këtë drejtim, Ukshini potencoi rëndësinë për të qenë në hap me trendet bashkëkohore teknologjike si kusht i bashkëpunimit në nivele ndërkombëtare.
Diedon Kica, bursist i KAEF dhe përfaqësues i BP Home, tha se emërues i përbashkët në suksesin e sektorit të digjitalizimit, është entuziazmi i vazhdueshëm i Kosovës dhe kapaciteteve të saj, në drejtim të së cilit duhet të shtyhet edhe më përpara.
Përderisa diskutimi dha një frymë pozitive ndaj zhvillimit të vazhdueshëm të Kosovës dhe kapaciteteve të saj, mungesa e burimeve dhe kualifikimeve adekuate qëndron si një nga sfidat kryesore në këtë sektor.