English 
Prishtinë, 18 korrik 2019 – Oda Ekonomike Amerikane në Kosovë organizoi tryezë rreth projektligjit të punës ku u diskutuan çështje të ndryshme brenda projektligjit të cilat ndikojnë në tregun e punës dhe operimet e bizneseve.Kryesuesja e Komisionit Parlamentar për Shëndetësi, Punë, dhe Mirëqenie Sociale, Besa Baftiu, tha se në mënyrë që të adresohen çështjet të cilat ndikojnë në tregun e punës që dalin nga Projektligji i Punës duhet të shqyrtohen edhe komentet e sektorit privat i cili ndikon direkt në operimet e tyre. Në krahasim me projektligjin paraprak, ajo tha se ky ligj është më i avancuar në rregullimin e tregut të punës, duke përfshirë edhe fusha të tjera si pushimi i lehonisë, në bazë të legislacionit të Bashkimit Evropian, duke shtuar se në këtë projektligj janë përfshirë 70 direktiva të BE-së. Baftiu shtoi se mirëpresin komentet nga Oda Amerikane dhe bizneset anëtare të saj të cilat do të ndihmojnë në rishikimin dhe plotësimin e ligjit në mënyrë të duhur. Drejtori i Burimeve Njerëzore dhe Administratës në Meridian Corporation, Abdylkerim Ratkoceri, tha se krahasuar me projektligjin paraprak, nuk vërehen ndryshime të mëdha, duke përmendur disa aspekte të projektligjit si shkëputja e kontratës, pushimi mjekësor, dhe pushimi i lehonisë. Ratkoceri tha se nevojitet rishikimi i pushimit të lehonisë në ligj pasi që aktualisht përbënë barrë ndaj bizneseve dhe ndikon në punësim më të ulë të grave në këtë sektor, duke shtuar se konsiderimi i komenteve të sektorit privat rezulton në qëndrueshmëri dhe barazi në tregun e punës.
Më tutje, bizneset adresuan aspekte të caktuara nga projektligji i punës me ndikim në operimet e tyre, duke kërkuar që ligji të trajtojë barabartë punëmarrësit dhe punëdhënësit.