English 
Prishtinë, 26 nëntor, 2019 – Komiteti i Përgjegjësisë Sociale Korporative (CSR) i Odës Ekonomike Amerikane në Kosovë, diskutoi mbi zgjerimin e përgjegjësisë sociale korporatave dhe rritjen e ndikimit të saj në mënyrë që të ketë efekte më të mëdha zingjirore në shoqëri.
Naxhije Arifaj, Drejtoreshë e Komunikimit në KEDS, foli për aktivitetet e KEDS në përgjegjësinë sociale korporative ku si njërin nga projektet më të mëdha të kompanisë përmendi akademinë KEDS, si projekt i cili zbatohet tash e shtatë vite. Arifaj përmendi se akademia ka për qëllim të përkrahë studentët vendorë të fushës së inxhinierisë elektrike në zhvillim të mëtutjeshëm akademik dhe profesional. Për më tepër, kjo akademi përkrahë iniciativa lokale për të promovuar jetesë të shëndetshme mjedisore dhe ruajtje të energjisë. Arifaj theksoi se bizneset duhet të vazhdojnë me projekte të CSR, pasi që është shoqëria ajo e cila përfiton nga këto projekte.
Valentina Gara, Menaxhere e Marrëdhënieve Publike dhe Ankesave në Aeroportin Ndërkombëtar të Prishtinës, tha se edhe Aeroporti i Prishtinës është fokusuar në fushat e edukimit dhe mjekësisë me projekte të ndryshme të cilat u shërbejnë qytetarëve. Gara u shpreh se është e rëndësishme që investimet e përgjegjësisë sociale korporative mos të jenë vetëm financiare, por me fokus edhe në burimet njerëzore, duke e konsideruar investimin në edukimin e të rinjve si një nga përgjegjësitë sociale korporative më të rëndësishme.
Ariel Shabani, Kryesues i Komitetit të Përgjegjësisë Sociale Korporative të Odës Amerikane dhe Drejtor për Zhvillim të Biznesit & Menaxher i Kualitetit në KIVO, u shpreh se kompanitë duhet së pari të identifikojnë nevojën për projekte të tilla në mënyrë që të orientohen në krijimin e një plani afatgjatë. Ai gjithashtu foli për projektet e kompanisë KIVO në këtë fushë, duke përmendur se projektet fillestare në të cilat KIVO është përkushtuar kanë qenë kryesisht të natyrës së bamirësisë, ndërsa më pas këto projekte janë fokusuar edhe në fusha si kultura, sporti, dhe edukimi.
Artan Ramaj, Menaxher i Burimeve Njerëzore dhe Marketingut në Al Trade Center, duke informuar më shumë rreth projekteve dhe iniciativave të ndërmarra nga kompania Al-Trade, gjithashtu e mbështeti idenë e identifikimit të nevojave. Ramaj shtoi se të gjithë qytetarët duhet të mbajnë përgjegjësi për projektet të cilat realizohen për të mirën e shoqërisë, lidhur me të cilën ofroi edhe gatishmërinë e kompanisë për bashkëpunim me kompani të tjera për realizimin e ndonjë projekti të këtij lloji.