English 
Prishtinë, 22 nëntor 2019 – Në vazhdimësi të aktiviteteve të Javës Globale të Ndërmarrësisë, të rinjtë e Komunës së Vitisë patën mundësi të dëgjojnë dhe të marrin përgjigje në pyetjet e tyre për sfidat dhe përfitimet e biznesit nga ndërmarrësi Ardian Hoxha në aktivitetin “Të bëhesh Ndërmarrës: Perspektivat e Vetë-Punësimit” të organizuar në bashkëpunim me Agjencinë e Zhvillimit Rajonal Lindje, në të cilin mori pjesë edhe Kryetari i Vitisë Sokol Haliti.
Ndërmarrësi i suksesshëm Ardian Hoxha, me këtë rast i motivoi të rinjtë e Vitisë për të caktuar qëllime dhe për të punuar sa më shumë që të i arrijnë ato. Ai gjithashtu e shpalosi me ta rrugëtimin e tij si ndërmarrës, ku përmendi sfidat e shumëta që i kishte kaluar për të qenë i suksesshëm. Arian Zeka, Drejtor Ekzekutiv i Odës Amerikane, u shpreh se Kosova edhe pse është vend në zhvillim, ofron mundësi të mëdha. Ai i inkurajoi të rinjtë që në të ardhmen të kontribuojnë në zhvillimin ekonomik të vendit, duke zgjedhur ndërmarrësinë si një opsion për krijimin e vende të reja të punës.